Məhəllələrdə alternativ yolları kim bağlayır? - Hərəkətə qəsdən mane olurlar - VİDEO

Paytaxtın bir sıra məhələlərində bina sakinləri əraziyə avtomobillərin girişini məhdudlaşdırmaq üçün yerdə müxtəlif maneələr  quraşdırırlar. Bunlar əsasən  kustar üsulla düzəlilən metal şlaqbaum, kərpic, dirək və digər maneələrdir.

Avtosfer.az xəbər verir ki, Binəqədi rayonu 7-ci mkr-da anlaloji hal baş verib.

Belə ki, Süleyman Sani Axundov və Abay Kunanbayev küçələrinin kəsişməsində binanın qarşısına qoyulan daşlar nəqliyyatın hərəkətini məhdudlaşdırır və sürücülər üçün ciddi çətinliklər yaradır. Sakinlərin bu cür addımları yolu bağlayaraq avtomobillərin rahat və maneəsiz keçməsinə əngəl törədir. Sürücülər daralan keçiddə manevr etməkdə çətinlik çəkir və bəzi hallarda alternativ yol axtarmaq məcburiyyətində qalırlar. Bu isə nəqliyyatın axınına mənfi təsir göstərir və ərazidə narazılıq yaradır.

Qeyd edək ki, qaydaları bu cür pozan şəxslər İnzibati Xətalar Məcəlləsinin 354.0.4-cü maddəsinə əsasən, fiziki şəxslər 80 manatdan 100 manatadək məbləğdə, vəzifəli şəxslər 400 manatdan 500 manatadək məbləğdə, hüquqi şəxslər 3000 manatdan 4000 manatadək məbləğdə cərimə edilir.

Eltac Zülfüqaroğlu