Qırmızıda keçən "Nissan" yolayrıcına tələsən "Mercedes"lə belə toqquşdu - ANBAAN VİDEO

Sürücünün yolda olan zaman diqqət etməli olduğu iki mühüm məqam var. Bunun birincisi svetofor, digəri isə yol nişanlarıdır. Xüsusilə yolayrıcına daxil olan zaman buna ikiqat diqqət etmək lazımdır. Təəssüf ki, sürücülərin əksəriyyəti yaşıl işıq qırımızıya və ya əksinə keçən anda yolayrıcına daxil olmağa tələsir. Təsəvvür edin ki, sağdan gələn maşın yaşıl işıq yanan kimi, digəri isə qırımızı sönən anda yolayrıcına çıxır. Məhz bu tələsməyin nəticəsində də qəzalar baş verir.

Avtosfer.az-ın sizə təqdim etdiyi görüntülər bir müddət əvvəl Babak prospektində qeydə alınıb. Belə ki, prospektin şəhər istiqamətində hərəkətdə olan “Nissan Note” markalı avtomobilin sürücüsü svetoforun qırmızı işığında yolayrıcına daxil olur. Bu zaman Keşlə qəsəbəsi istiqamətində yolayrıcına daxil olmaq üçün növbəsini gözləyən “Mercedes” markalı avtomobilin sürücüsü yaşıl yanan kimi hərəkətə başlayır. Nəticədə qəza baş verir. Sürücülər ciddi xəsarət almasa da hər iki avtomobilə ciddi ziyan dəyir.

Sözügedən qəzada təbii ki, günah “Nissan” markalı avtomobilin sürücüsünündür. Lakin “Mercedes” markalı avtomobilin sürücü ehtiyatlı davranmaqla qəzanın qarşısını ala bilərdi.

Odur ki, əziz sürücülər təqdim etdiyimiz görüntülər sizin üçün bir nümunə olsun. Yol nişanlarına və svetoforun işıqlarına diqqət edin. Yolayrıcına çıxmağa tələsməyin. Unutmayın ki, qarşı tərəfdən də sizin kimi tələsən sürücü gələ bilər.

Orxan Əli