Rusiyadan Bakıya yük gətirən maşınların ehtiyat hissələrini kim oğurlayıb? - RƏSMİ - VİDEO

Paytaxtın Məhəmmədli qəsəbəsində park edilmiş yük maşınlarının ehtiyat hissələri oğurlanıb.

Avtosfer.az xəbər verir ki, bu barədə izləyici redaksiyamızın qaynar xəttinə müraciət edərək videomaterial göndərib. Zərərçəkmişin sözlərinə görə, oktyabrın 4-də Rusiyanın Tambov şəhərindən sözügedən ərazidə fəaliyyət göstərən “Dashyunu” MMC-yə yük gətiriblər. Lakin yükü daşıdıqları 44-BV-565 dövlət nömrə nişanlı və 44-CX-794 dövlət nömrə nişanlı “DAF 105” markalı avtomobillərin sürətlər qutusunun beyni MMC-yə məxsus ərazidə oğurlanıb.

Sürücü, sözügedən şirkətin maşınların açar və sənədlərini təhvil alaraq onları arxayın salsa da, iki gün sonra xoşagəlməz mənzərəylə qarşılaşdıqlarını qeyd edib: “Şirkət həm içəridə, həm də çöldə təhlükəsizlik kameralarının olduğunu bizə bildirdiyi üçün maşınların açar və sənədlərini onlara əminliklə təqdim etdik. İki gün sonra MMC-nin əməkdaşları bizimlə əlaqə saxlayaraq yükü boşaltmaq üçün əraziyə çağırdı. Lakin prosesi icra edən zaman avtomobillərdə nasazlığın olduğunu aşkar etdik. Daha sonra hər iki maşının detalının - sürətlər qutusunun beyninin oğurlandığı bəlli oldu”.

Zərərçəkmiş hadisədən sonra aidiyyəti orqanlara müraciət etdiklərini, lakin hələ də cavabsız qaldığını əlavə edib.

Oktyabrın 8-də vətəndaş Ramin İsgəndərov DİN-in “102” Xidməti-Zəng mərkəzinə müraciət edərək idarə etdiyi “Daf 105” markalı avtomobillərə məxsus 2 ədəd avtomatik idarə etmə qurğusunun oğurlanması barədə məlumat verib.

Daxili İşlər Nazirliyinin Mətbuat Xidmətinin əməkdaşı polis leytenantı Lumu İsrəfilli Avtosfer.az-ın soruğusuna cavab olaraq bildirib ki, daxil olan müraciətlə əlaqədar hazırda Sabunçu RPİ-nin 15-ci Polis Bölməsində təhqiqat araşdırması aparılır.

Nərmin