Tıxacı yaradan bəzi sürücülərdir - Bu da fakt - BELƏ ETMƏYİN! - VİDEO

Paytaxtın Heydər Əliyev prospektində sürücülərin ləng hərəkət etməsi yolda uzun tıxaca səbəb olub. Avtosfer.az xəbər verir ki, sıxlıq "saatlı bina" kimi tanınan ərazidən, yəni Ağa Nemətulla küçəsi ilə kəsişmədən başlayaraq "Koroğlu" metrostansiyasına qədər uzanıb.

Tıxacın səbəbləri araşdırılarkən maraqlı bir məqam ortaya çıxıb. Sürücülər qarşı istiqamətdə aparılan təmir işlərini izləmək üçün sürəti azaldıblar. Bu hal isə onların hərəkətini ləngidərək, ardınca gələn avtomobillərin axınının pozulmasına gətirib çıxarıb. Nəticədə, əsas prospektdə uzun tıxac yaranıb.

Bu cür hallar Bakı yollarında tez-tez təkrarlanan bir problemə çevrilib. Kiçik qəzalar, yol kənarında dayanmış avtomobillər və ya hətta hansısa qeyri-adi hadisə sürücülərin marağına səbəb olur. Onlar həmin hadisəyə baxmağa çalışaraq sürəti azaldır. Nəticədə kiçik bir problem saatlarla davam edən tıxaclara səbəb olur.

Bu cür halların yalnız vaxt itkisinə deyil, həm də təhlükəsizliyə ciddi təsiri var. Yolda baş vermiş qəzaya tamaşa edən və eyni anda diqqətini yoldan yayındıran sürücülər, bəzən özləri də qəza törədirlər. Statistikaya əsasən, belə diqqətsizlikdən qaynaqlanan ikinci dərəcəli qəzalar heç də nadir hadisə deyil.

Yollarda tıxacların yaranmaması və qəzaların baş verməməsi üçün, sürücülərə lüzumsuz yerə sürəti azaltmamasını və diqqətlərinin yalnız yolda olmasını tövsiyə edirik. Bir daha vurğulayırıq ki, hər bir sürücünün müəyyən qədər sürəti azaltması və ləngiməsi yolda tıxaca, hətta qəzaların baş verməsinə gətirib çıxarır.

Nərmin