Tıxacı yaradanlar və tıxacda qalanlar: Binədə insan həyatı ilə oynayanlar kimlərdir? - VİDEO

Tıxac artıq gündəlik həyat tərzimizə çevrilib. Paytaxt Bakıda bir neçə nöqtə var ki, oranı günün istənilən saatında tıxacsız təsəvvür eləmək olmur. Bəzən gecə saatlarında belə həmin ərazidə yüngün də olsa sıxlıq müşahidə olunur. 

Avtosfer.az xəbər verir ki, sentyabrın 16-dan etibarən Bakıda tıxacların kəmiyyəti 2-3 dəfə artıb. Səbəb bəllidir. Məktəblər, universitetelər açılıb, yay tətilindən gələnlər var. 

Görüntüdəki ərazi Bakının Xəzər rayonunun Binə qəsəbəsidir. Avtomobillərin pərakəndə şəkildə hərəkət etdiyi bu yol isə qəsəbənin əsas prospekti olan Əli İsazadə küçəsidir. Küçə nəqliyyat vasitələrinin gəlişi və gedişi üçün nəzərdə tutulan iki istiqamətli yol kimi istifadəyə verilib.

Amma hər gün səhər saatlarında böyük nəqliyyat axınınına görə bəzi avtomobillər küçənin hər iki tərəfindən bir istiqamətli yol kimi istifadə edirlər. “Manatlıq” taksilər və yatıb qaldığı üçün işə gecikən sürücülər, eləcə də məktəbliləri daşıyan mikroavtobuslar isə 5-3 manat artıq qazanmaq üçün əks istiqamətli yolda hərəkət edərək insanların həyatını təhlükəyə atırlar.

Bu məsuliyyətsiz sürücülər “Sovxoz” deyilən ərazidən Binənin mərkəzinə doğru kilometrlərlə yolu əks istiqamətdə hərəkət edir, qarşıdan gələn avtomobillər üçün də təhlükəli vəziyyət yaratmış olurlar. Bəhanə isə bəllidir: işə gecikirik, məktəbə gecikirik.

Ümid edirik ki, aidiyyəti qurumlar bu məsələni nəzarətə götürəcək və baş verə biləcək hər hansı böyük faciənin qarşısını almış olacaqlar.

Orxan