Vəsiqəsi olmadan sərxoş halda "avtoş"luq edən sürücü ağır qəza törətdi; yaralılar var - VİDEO

Sərxoş vəziyyətdə avtoxuliqanlıq edən sürücü iki nəfərin xəsarət almasına səbəb olub.
Avtosfer.az xəbər verir ki, Türkiyənin Karabük bölgəsində baş verən hadisənin görüntüləri başqa bir avtomobilin kamerasına düşüb. 
Məlumata görə, AY. idarə etdiyi 06-FV-9439 dövlət nömrə nişanlı avtomobillə hərəkətdə olan zaman sağ-sol edərək digər hərəkət iştirakçılarına təhlükə yaradıb. Bir müddətdən sonra idarəetmədən çıxan nəqliyyat vasitəsi M.İ.-nin idarə etdiyi 78-ABJ-554 dövlət nömrə nişanlı mikroavtobusa çırpılıb. 
Ətrafdakı vətəndaşların çağırışından sonra hadisə yerinə polis və tibb qrupları gəlib. Qəzada xəsarət alan minik avtomobilinin sürücüsü və mikroavtobusda olan sərnişin Ö.K.-yə ilkin tibbi yardım göstərildikdən sonra xəstəxanaya aparılıb. Xəsarət alanların həyatı üçün təhlükənin olmadığı bildirilir.
Yoxlamalar zamanı müəyyən edilib ki, qəzaya səbəb olan A.Y.-nin  sürücülük vəsiqəsi olmayıb və o, 1,92 promilli sərxoş olub.
Qəza ilə bağlı araşdırmalara başlanılıb.

Namiq Musayev