Nömrə 1000 dollara, maşın pulsuz satılır - FOTO

Macarıstanda köhnə avtomobil sahibi qeyri-adi satış elanı ilə diqqət çəkib. O, "BYD-666" dövlət qeydiyyat nişanını satır, avtomobili isə faktiki olaraq pulsuz verir.

Avtosfer.az xəbər verir ki, elan "Facebook"dakı BYD həvəskarları qrupunda yerləşdirilib.

Hazırda "BYD-666" nömrəsi 1989-cu il istehsalı olan "Maruti 800" avtomobilinin üzərindədir.

Satıcının sözlərinə görə, tələb etdiyi məbləğ avtomobilə deyil, məhz xüsusi dövlət qeydiyyat nişanına görədir. Avtomobil isə nömrə ilə birlikdə alıcıya verilir.

Ümumi qiymət təxminən 1000 dollar təşkil edir. Satıcı avtomobilin yaxın vaxtlarda yeniləndiyini də bildirib.

Nömrəni başqa avtomobilə keçirmək asan deyil

Lakin alıcı "BYD-666" nömrəsini avtomobildən çıxarıb dərhal başqa maşına taxa bilməyəcək.

Bunun üçün əvvəlcə "Maruti 800" yenidən qeydiyyatdan keçirilməli, daha sonra "BYD-666" fərdi seçilmiş dövlət qeydiyyat nişanı kimi alınmalıdır. Yalnız bundan sonra nömrənin başqa avtomobilə keçirilməsi mümkün olacaq.

Satıcının sözlərinə görə, bütün bu inzibati prosedurlar əlavə olaraq təxminən 630 dollara başa gələcək.

Elana əsasən, qeyri-adi nömrə artıq potensial alıcıların diqqətini çəkib. Satıcı onunla bağlı bir neçə müraciət aldığını bildirib.