Axşam araq içib səhər maşın sürən şəxsi YPX cərimələyə bilərmi?

Axşam saatlarında spirtli içki qəbul edən şəxsin səhər saatlarında sükan arxasına keçməsi cəmiyyətdə tez-tez müzakirə olunan məsələlərdəndir. Xüsusilə də sürücülər arasında “axşam içilən alkoqolun səhər cəriməyə səbəb olub-olmaması” sualı aktuallığını qoruyur.

Maraqlıdır, axşam içən şəxsə səhər buna görə cərimə yazıla bilərmi?

Avtosfer.az-ın məlumatına görə, mövzu ilə bağlı Konkret.az-a açıqlama verən nəqliyyat eksperti Eldəniz Cəfərov bildirib ki, bu, qəbul edilən spirtli içkinin miqdarından asılıdır. Onun sözlərinə görə, əgər sürücü az miqdarda spirtli içki qəbul edibsə, səhər saatlarında nəfəsdə və qanda alkoqolun miqdarı xeyli azalır və bu, adətən ölçmə zamanı aşkar edilmir.

Ekspert qeyd edib ki, spirtli içki çox miqdarda qəbul edildikdə isə vəziyyət fərqli ola bilər:

“Əgər şəxs axşam saatlarında xeyli miqdarda spirtli içki qəbul edibsə, səhər saatlarında belə bu, özünü göstərir. Belə hallarda alkoqolun qanda və nəfəsdə qalması mümkündür və bu da inzibati məsuliyyətə səbəb olur”.

Eldəniz Cəfərovun sözlərinə görə, yol polisi tərəfindən aparılan yoxlama zamanı alkoqolun normadan artıq olması aşkarlanarsa, sürücüyə qanunvericiliyə uyğun olaraq cərimə və digər inzibati tədbirlər tətbiq edilə bilər.