Bu yoldan sola dönəndə diqqətli olun: 3 bal 100 manat cərimə yazılır - VİDEO

Bakının mərkəzi küçələrindən biri olan Lermontov küçəsində son zamanlar sürücülər cərimələnirlər. Avtosfer.az xəbər verir ki, paytaxtın İstiqlaliyyət küçəsindən Mixail Lermontov küçəsinə dönən sürücülər əks zolağa çıxdıqları üçün qayda pozuntusuna yol verirlər. Bunun əsas səbəbi yol hərəkətinin düzgün təşkil olunmaması və sürücülərin zolaqların istiqaməti barədə məlumatlı olmamasıdır.

Qeyd edək ki, həmin yol hissəsində 1 gediş və 2 gəliş zolağı mövcuddur, lakin sürücülərin çoxu bunu bilmir. Bu, əsasən, yolun girişində 5.8.8 nişanının – zolaqlar üzrə hərəkəti göstərən nişanın olmaması ilə bağlıdır. Nəticədə, sürücülər hansı zolağın hansı istiqamətə aid olduğunu müəyyən edə bilmir və istəmədən əks zolağa çıxaraq qayda pozurlar.

Sürücülər sola dönərkən düzgün zolağı seçmədikdə, nəinki cərimə olunurlar, həm də təhlükə ilə üz-üzə qalırlar.

Bu problemi aradan qaldırmaq aidiyyəti qurumlar tərəfindən yol nişanlarının quraşdırılması və zolaqların düzgün xətlərlə işarələnməsi zəruridir. Sürücülərə isə həmin ərazidən keçərkən xüsusilə diqqətli olmaları, sola dönərkən sağ zolağa daxil olaraq qaydalara uyğun manevr etmələri tövsiyə olunur.

Könül Rauf