Gənc sürücü “KamAZ”la “şou” göstərdi - Əyləci çəkib tozu dumana qatdı - VİDEO

Yük maşınıyla təhlükəli manevrlər edən sürücünün görüntüsü sosial şəbəkədə paylaşılıb.

Avtosfer.az-ın məlumatına görə, 10-RP-046 dövlət nömrə nişanlı “KamAZ” markalı yük maşınının sürücüsü sərt manevrlər edərək “şou” göstərib. Kadrdan da görünür ki, o, əl əyləcini çəkərək maşını əks istiqamətə fırladıb. Bu vaxt o, özüylə yanaşı maşında olan sərnişinə də təhlükə yaradıb. Lakin sürücü və sərnişinin videoda əks olunan görüntüləri bu vəziyyətdən məmnun olduqlarını aydın şəkildə göstərir.

Qeyd edək ki, bəzi sürücülər yolun hərəkət hissəsindən kənar ərazilərdə, yaxud digər nəqliyyat vasitələrinə təhlükə yaratmadıqları halda lüzumsuz manevrlər etməyin qayda pozuntusu hesab olunmadığını əsas gətirirlər. Lakin sükan arxasında olan hər bir sürücü istənilən halda təhlükəli manevrlər etməməlidir. Bu, hər şeydən öncə sürücünün həyatını riskə atır və qəzaya səbəb ola bilər. 

Nərmin