Motosiklet sürücülərinin dəbilqəyə vurduğu örtüklər cərimə səbəbidir – RƏSMİ AÇIQLAMA - FOTO

Bəzən motosiklet sürücüləri fərqlilik yaratmaq və dəbilqələrinə estetik görüntü qatmaq məqsədilə onların üzərinə bəzi heyvanların görünüşünü örtük, stiker və ya başqa elementlər kimi əlavə edirlər.

Avtosfer.az xəbər verir ki, sosial şəbəkələrdə bu məsələ ilə bağlı sürücülər arasında tez-tez suallar yaranır. Bu dəyişikliklərin yol hərəkəti təhlükəsizliyi və hüquqi məsuliyyət baxımından hansı nəticələrə səbəb ola biləcəyi isə müzakirə mövzusudur.

Mövzu ilə bağlı avtomobil eksperti Eldəniz Cəfərovun fikrincə, mövcud qanunvericiliyə əsasən, motosiklet sürücüləri üçün dəbilqə taxmaq məcburidir:

“Azərbaycanda motosiklet dəbilqəsinin üzərinə örtük, stiker və ya hansısa elementin əlavə olunması ilə bağlı birbaşa qadağa və ya cərimə nəzərdə tutulmayıb. Dəbilqəyə estetik məqsədlə əlavə olunan bəzəklər, əgər təhlükəsizlik və sürücünün aydın görməsinə təsir etmirsə, cərimə səbəbi deyil".

Baş Dövlət Yol Polisi İdarəsinin inspektoru, polis baş leytenantı Elvin Hacıyev isə saytımıza açıqlamasında bildirib ki, dəfələrlə xəbərdarlıq edilməsinə baxmayaraq, bəzi sürücülər hələ də bu kimi əməllərə yol verirlər:

"Baş DYP İdarəsi motosiklet sürücülərinin dəbilqəyə vurduqları müxtəlif çağırışların, şüarların, fotoşəkillərin, eləcə də etiket və sair məlumatların hərəkət iştirakçılarına emosional təsiri baxımından və hərəkətin təhlükəsizliyi nöqteyi-nəzərindən yolverilməz olduğunu bir daha sürücülərin diqqətinə çatdırır. Belə hallara qarşı adekvat tədbirlərin görüldüyünü bildiririk".

İnzibati Xətalar Məcəlləsinin 329.2-ci maddəsinə əsasən, motosiklet sürücüsünün dəbilqə taxmaması və ya onu düzgün bağlamaması halında 40 manat məbləğində cərimə tətbiq olunmasını nəzərdə tutur.

Əgər dəbilqəyə əlavə edilən bəzəklər sürücünün görmə qabiliyyətini azaldır və ya yol hərəkəti təhlükəsizliyinə mənfi təsir göstərirsə, bu, 327.1-ci maddəyə əsasən “yol hərəkəti qaydalarının pozulması” kimi qiymətləndirilə və 40 manat cərimə ilə nəticələnə bilər.

Fidan