Qanuni parklanma yeri maneələrlə bağlanıb – Sürücülər cərimələnir - VİDEO

Paytaxtın Sabunçu rayonu, Bakıxanov qəsəbəsi, Oskar Əfəndiyev küçəsində yerləşən qanuni parklanma zonasının zəbt olunduğu iddia edilir.

Avtosfer.az-ın “WhatsApp” xəttinə daxil olan görüntülərdə bildirilib ki, ərazidə fəaliyyət göstərən “Addım-Addım” uşaq bağçasının qarşısındakı Azparking-ə məxsus parklanma yerləri müxtəlif maneələrlə bağlanıb. Kadrlardan görünür ki, parklanma sahəsinə daşlar, dibçəklər və dəmir konstruksiyalar yerləşdirilib. Videoda Azparking-ə məxsus yol nişanlanmaları da aydın görünür ki, bu da həmin ərazinin qanuni parklanma zonası olduğunu göstərir.

İddialara görə, parklanma yerlərinin bu şəkildə istifadəyə yararsız vəziyyətə salınması səbəbindən sürücülər avtomobillərini yolun hərəkət hissəsində saxlamağa məcbur qalırlar. Bu isə onların inzibati məsuliyyətə cəlb olunmasına, 2 bal və 80 manat məbləğində cərimələnməsinə səbəb olur.

Qeyd edək ki, qanunvericiliyə əsasən, ümumi istifadədə olan parklanma yerlərinin hər hansı fiziki maneələrlə zəbt edilməsi və ya digər şəxslərin istifadəsinin məhdudlaşdırılması yolverilməzdir. Məsələ ilə bağlı aidiyyəti qurumların araşdırma apararaq qanunamüvafiq tədbirlər görəcəyinə ümid edirik.

Nərmin