Qaydaları pozub görüntüləri sosial şəbəkədə PAYLAŞDI - Həbs olundu - VİDEO

Avtoxuliqanlıq hərəkətləri edərək sosial şəbəkədə paylaşan daha bir şəxs həbs edilib.

Avtosfer.az-ın məlumatına görə, DİN-in Mətbuat Xidmətindən “Qafqazinfo”ya bildirilib ki, 28 yaşlı Rüstəm Həsənov inzibati məsuliyyətə cəlb edilib.

Belə ki, onun  idarə etdiyi “VAZ 2121” (Niva) markalı 90-DH-344 dövlət qeydiyyat nişanlı avtomobillə Abşeron rayonu ərazisində hərəkətdə olarkən ictimai qaydanı pozaraq avtoxuliqanlıq əməli törətdiyi və bu növ videoları sosial şəbəkələrdə paylaşaraq insanların haqlı narazılığına səbəb olduğu üçün Abşeron RPİ DYPŞ-nin əməkdaşları tərəfindən saxlanılıb.

Həmçinin, sosial şəbəkələrdə paylaşılan görüntülərdə sürücünün daha bir qayda pozuntusu da aşkar edilib.

Belə ki, araşdırmalarla R.Həsənovun idarə etdiyi avtomobilin üzərində qanunvericiliklə qadağan olunan konstruksiya dəyişikliyi edərək nəqliyyat vasitəsini bu vəziyyətdə idarə etdiyi də məlum olub. Müvafiq sənədləşdirmə aparılaraq toplanmış material baxılması üçün məhkəməyə göndərilib. Məhkəmənin qərarı ilə R.Həsənov əməlinə hüquqi qiymət verilərək o, 20 sutka inzibati qaydada həbs edilib və sürücülük hüququ 1 il müddətinə məhdudlaşdırılıb.

DİN-dən bildirilib ki, avtoxuliqanlıq əməlləri törədənlərə qarşı tədbirlər davam etdiriləcək:

“Yol hərəkəti qaydalarını pozaraq özlərini və ətrafdakı insanların həyatını təhlükəyə atmasınlar, nəzərə alsınlar ki, sosial şəbəkələrdə paylaşılan bu növ qayda pozuntularının hər biri diqqət mərkəzində saxlanılır və qayda pozan hər bir şəxs aşkar edilərək barələrində qanunamüvafiq tədbirlər görülür”.