Qaydaları tapdalayan sürücü təhlükəli “şou”ları ilə özünü ifşa etdi - 30-BM-045 - VİDEO

Paytaxtın müxtəlif ərazilərində yol hərəkəti qaydalarını kobud şəkildə pozan sürücü davranışlarını sosial şəbəkə hesabında paylaşaraq diqqət çəkməyə çalışıb.

Avtosfer.az-ın məlumatına görə, 30-BM-045 dövlət nömrə nişanlı “Saipa” markalı avtomobilin sürücüsü hərəkət zamanı təhlükəli manevrlər edərək təkərlərin sürtünməsi səsləri çıxarıb.

Bibiheybət yolunda qeydə alınan görüntülərdə sürücünün avtomobili davamlı olaraq sağa və sola yönəltməsi, bütöv xəttin tələbini pozaraq əks istiqamətli yola çıxması açıq şəkildə görünür.

Mikayıl Useynov küçəsində lentə alınan digər kadrda isə sürücünün heç bir zərurət olmadan duman işıqlarını yandıraraq hərəkəti davam etdirdiyi, avtomobilin arxa dövlət nömrə nişanına qanunla qadağan edilmiş göy işıq cihazı quraşdırdığı və konstruksiyasına müdaxilə etdiyi müşahidə olunur.

Qeyd edək ki, bu cür “şou” xarakterli hərəkətlər təkcə qayda pozuntusu deyil, eyni zamanda qəza riskini artırır. Sosial şəbəkələrdə paylaşım naminə edilən məsuliyyətsiz manevrlər isə sonda ağır nəticələrə yol aça bilər.

Nərmin