Skuterlərin harda gəldi park edilməsi problem yaradır – VƏTƏNDAŞ ŞİKAYƏTİ - FOTO

Paytaxtda elektrik skuterlərinin nəzarətsiz şəkildə park edilməsi ilə bağlı narazılıqlar artmaqdadır. 

Avtosfer.az xəbər verir ki, xüsusilə dayanacaq, səkilər və piyada keçidlərinin yanında qoyulan skuterlər həm piyadaların hərəkətinə mane olur, həm də yol-nəqliyyat təhlükəsizliyini pozur. Bu dəfə isə Tbilisi prospektində avtobus dayanacağında çəkilən görüntülərdə skuterlərin avtobus dayanacağında park edildiyini görürük. 

Dayanacaqda təsadüfi şəkildə buraxılan skuter sərnişinlərin avtobusa minməsinə mane olur və ərazidə sıxlıq yaradır. Bu cür halların son zamanlar daha tez-tez müşahidə edilməsi nəzarət mexanizmlərinin təkmilləşdirilməsini gündəmə gətirir.

Mütəxəssislər bildirirlər ki, skuterlərin düzgün park edilməsinə nəzarət üçün şəhərdə xüsusi qaydalar və cərimə mexanizmi daha aydın şəkildə tətbiq olunmalıdır. Onların fikrincə, paylaşılan skuter şirkətləri də məsuliyyət daşımalı, parkinq zonalarını genişləndirməli və istifadəçilərə xəbərdarlıqlar etməlidirlər.

Eyni zamanda, nəqliyyat mütəxəssisləri qeyd edirlər ki, avtobus dayanacaqları, piyada keçidlərinin yaxınlığı və fövqəladə xidmətlərin giriş sahələri kimi ərazilər skuter parkinqi üçün tamamilə qadağan olunmalıdır. Bu qaydaları pozan istifadəçilərə cərimələrin tətbiqi, həmçinin skuter şirkətlərinə məsuliyyətin birgə paylanması təklif olunur.

Eltac Zülfüqaroğlu