Yolayrıcında qəfil zolaq dəyişən sürücü qəza şəraiti yaratdı - 99-GT-074 - VİDEO

Bakı şəhəri, Dilarə Əliyeva və Rəşid Behbudov küçələrinin kəsişməsində qayda pozan sürücü avtomobil kamerasına düşüb. Avtosfer.az-ın məlumatına görə, hadisə yanvarın 7-də saat 07:21 radələrində qeydə alınıb.

Belə ki, hərəkətdə olan 99-GT-074 dövlət nömrə nişanlı “Opel” markalı avtomobilin sürücüsü düzgün zolaqda yerləşməyib. Videodan görünür ki, o, yalnız düzünə hərəkətə icazə verən zolaqda dayanıb və işıqforun yaşıl işığında hərəkətə başlayarkən sağa dönən avtomobilin qəfil zolağına manevr edib. Nəticədə həmin zolaqdakı sürücüyə qəza şəraiti yaranıb. Xoşbəxtlikdən qarşı tərəf vaxtında reaksiya verərək təhlükənin qarşısını ala bilib.

Qanunvericiliyə görə, sürücülər yalnız işıqfor və yol nişanları ilə müəyyən olunmuş zolaqda hərəkət etməli, manevr zamanı digər nəqliyyat vasitələrinin təhlükəsizliyini təmin etməlidir. Hərəkət zolaqlarını düzgün istifadə etməmək həm qəza riskini artırır, həm də inzibati məsuliyyət yaradır.

Nərmin