Türk xalqı Azərbaycanın milli maraqlarını nəzərə almalıdır – ŞƏRH

Azərbaycanın BMT-dəki nümayəndəsinin zalı tərk etməməsi Türkiyənin bəzi sosial media seqmentlərində müzakirələrə və sərt reaksiyalara səbəb olub. Məsələ iki ölkə arasında ictimai müstəvidə narazılıqların yaranmaması baxımından da diqqət çəkir.

Avtosfer.az xəbər verir ki, məsələ ilə bağlı yaranan narazılıqların iki ölkə arasındakı münasibətlərə təsir etməməsi üçün qarşılıqlı anlaşmanın qorunması vacibdir. 
Bəs Azərbaycan və Türkiyə bu məsələdə hansı addımları atmalıdır?

Mövzu ilə bağlı siyasi şərhçi Əziz Əlibəyli Avtosfer.az-a açıqlamasında bildirib ki, Azərbaycanın milli maraqları var:

''Türkiyə və Azərbaycan bir coğrafiyada yerləşsələr də, fərqli dövlətlərdir. Təbii ki, onlar qardaş dövlətlərdir və Azərbaycan-Türkiyə maraqların toqquşduğu sahələrdə bir-birinə zidd addımlar atmaz. Amma Türkiyə də Azərbaycanın maraqlarını qəbul etməli, başa düşməli və buna hörmətlə yanaşmalıdır. Sadəcə, Türkiyədə çox böyük bir qara təbliğat qrupu var və bu, artıq narahatlıq doğuran faktordur. Ən azından dünən Türkiyə Prezidenti Rəcəb Tayyib Ərdoğanın Azərbaycanın Anım Günü münasibətilə başsağlığı verməsi və Türkiyə-Azərbaycan arasında böyük qardaşlıq və əməkdaşlığın möhkəmlənməsi, ortaq dəyərlərimizin formalaşması baxımından əhəmiyyətlidir. Vətən müharibəsi də bu ortaq dəyərlərdən birinə çevrilib. Bu baxımdan, bunlar Türkiyənin də diqqətdən kənarda qoymayacağı məsələlər olmalıdır. Türkiyə dövləti öz daxilində fəaliyyət göstərən, müxtəlif xarici təsirlərlə əlaqələndirilən qrupların fəaliyyətinə imkan verməməlidir. Çünki bu cür fəaliyyətlər müəyyən ictimai rəy formalaşdırmağa çalışır və nəticə etibarilə Azərbaycanla Türkiyənin münasibətlərinə xələl gətirməyə hesablanır''.

Fatimə