“Qanunlara əsasən, nəqliyyat vasitələri üzərində bayraqların olması nəzərdə tutulmur. Ümumiyyətlə, bayrağı pərdə kimi istifadə etmək düzgün deyil. Bayrağın hara vurulması qanunla müəyyən edilib. Axı bayraq sürücünü, sərnişini günəşdən qoruyan vasitə deyil”. Bunu Pravda.az-a açıqlamasında nəqliyyat məsələləri üzrə ekspert Elməddin Muradlı deyib.

O bildirib, ki, biz bayrağı həmişə başımızın üzərində saxlamalıyıq: “Məsələ qanunvericiliklə həll olunubsa, deməli, küçədə də, bayırda da həllini tapmalıdır. Bundan başqa, bəzi vətəndaşlar dini və ya oğru dünyasının şüarlarını, ümumiyyətlə, haranı təmsil edirlərsə, oranın şüalarını maşınlarının üstünə vururlar. Avtomobil sərgi salonu, kitab, dəftər deyil. Və yaxud da rəsm albomu deyil ki, ürəyin istəyən şəkili ora yapışdırasan. Avtomobilin üzərində belə şüar və şəkillərin olması nəzərdə tutulsaydı, zavodlar maşınları elə o cür buraxardı. Deməli, məsləhətli deyil. Həmçinin çox cılız görünür. Biri “İnstagram”, biri “Facebook” hesabını yazıb yapışdırıb üstünə. Belə etmək olmaz. Sürücülər diqqətli olmalıdırlar”.