Cinayətkar rejimin siyasəti Azərbaycanı haqq savaşa məcbur etdi

Ermənistanın həm daxili, həm də xarici siyasəti, Qarabağ probleminin danışıqlar yolu ilə həllini sıfıra bərabər etmişdi. Bu, obyektiv bir faktdır ki, düşmən ölkənin rəsmi  nümayəndələri bütün varlıqları ilə uzun müddət ərzində provokasiya tipli hərəkətlər edirdi. Bu isə Azərbaycan xalqının səbr kasasını daşırmışdı. Ermənistanın baş naziri Azərbaycanın tarixi torpağında yallı gedərkən və “Qarabağ Ermənistanındı, nöqtə” deyərkən, Azərbaycan xalqının heysiyyatına toxundu və beynəlxalq hüquqa zidd olaraq meydan oxudu. Proseslərin bu məcraya gəlməsinə həmçinin, dünyada Azərbaycana qarşı aparılan, ikili standartlar siyasəti də böyük rol oynadı. Belə ki,  dövlətimiz həm də bu ikili standartlara qarşı davamlı mübarizə aparmağa məcbur olmuşdu. Dünya birliyi sanki kor və kar olmuşdu. Dünyanın nüfuzlu qurumları sanki Azərbaycanı aldatmaqla məşğul idilər. Bu qurumlar erməni lobbisinin təsirinə və ermənilərin informasiya saxtakarlıqları ilə dolu “hücumlarına” məruz qalaraq, ədalətin Azərbaycan tərəfində olduğunu sanki eşitmək və görmək istəmirdi. Amma biz Ali Baş Komandanın rəhbərliyi ilə haqq savaşında qalib gəldik. Qələbəmizlə sadəcə ermənilərin üzərində qələbə qazanmadıq, Biz, qələbəmizlə bu qurumların  haqsız hərəkətlərinə cavab verdik. Çünki bəzi mənşəyi bilinməyən qüvvələr bu illər ərzində Ermənistanı sülhə deyil, əksinə silahlandırmaqla müharibəyə hazırlayırdılar. Gizlin deyil ki, bəzi ölkələr Ermənistanı hətta Vətən Müharibəsinin sonuncu gününə kimi ödənişsiz silah-sursatla təmin etdilər. Amma Azərbaycan əsgəri bütün bunlara baxmayaraq, düşmənin və düşmənə dəstək olan, bütün qüvvələrin belini qırdı. Ancaq gözəl başa düşürük ki, rahatlanmaq olmaz! Azərbaycanın Silahlı Qüvvələrini daha da güclü inkişaf etdirmək lazımdır! Çünki bu zamanın və mövcud reallığın tələbləridir. Düşmən tərəfdə revanşist ideyalarla yaşayan bəzi qüvvələr Müzəffər Ordumuzun gücünü, qüdrətini 44 gün ərzində çox aydın gördü. Bir vətəndaş kimi əminəm ki, Azərbaycan Dövləti igid və qəhraman oğlullarının canı və qanı bahasına azad olunmuş torpaqlarını bir daha yad əllərə verməmək naminə, düşmənə hər zaman layiqli cavab vermək qüdrətindədir.

Mehnətov Rəşad Siyasət oğlu

Vətən Müharibəsi iştirakçısı, ehtiyatda olan hərbi qulluqçu.