Heyvan sürüləri yollarda təhlükə yaratmaqda davam edir – Kimdir günahkar?

Bəzi yollarda heyvan sürülərinin təyin olunmamış yerdən keçirilməsi narahatlığa, hətta yol-nəqliyyat qəzalarına səbəb olur. Maraqlıdır, bu zaman kim məsuliyyət daşıyır? Sürü sahibi, yoxsa sürücü? Nəqliyyat eksperti Elməddin Muradlı sfera.az-a danışarkən bildirib ki, mal-qara sürülərinin təyin olunmayan yerdən keçirilməsi həqiqətən də ciddi problemə çevrilir: "Xüsusən də yay mövsümündə, eləcə də yaz və payız mövsümündə bu daha qabarıq hiss olunur. Yaylaqlara, qışlaqlara köçürülən mal-qaranın belə formada daşınması yol hərəkəti iştirakçıları üçün böyük təhlükədir. Bir çox rayonlarda artıq mal-qara, xüsusən də qoyun sürüsünün avtomobillər tərəfindən vurulması, xeyli heyvanın tələf olması barədə məlumatlar olur. Aydındır ki, fermerlərə ziyan dəyir. Amma digər tərəfdən bunun avtomobil sürücülərinə də ziyanı olur. Sürücünün burada nə qədər təqsirli olub-olmaması artıq başqa problemdir. Adətən heyvanı da, piyadanı da vuranda sürücü günahkar çıxır.

Yol hərəkəti təhlükəsizliyi baxımından bu dövrləri geridə qoymalıyıq. Sürünün maşınla daşınması daha təhlükəsizdir. Ətrafımda təsərrüfatla məşğul olan kifayət qədər insan ildə bir-iki dəfə əziyyət çəkib, iri tutumlu maşın tutaraq mal-qarasını yaylağa, qışlağa daşıtdırır. Getdiyin yerdə mal-qaranın itməsi, oğurlanması, maşınla vurulması problemdir. Elə bu xərcləri qarşılayıb hesablayanda baxırsan ki, maşınla daşımaq daha əlverişlidir. Bu istiqamətdə Kənd Təsərrüfatı Nazirliyi sahibkarlar, fermerlər arasında ciddi təbliğat aparmalıdır”.