“Düşünürlər ki, taksiyə minən bütün qadınlara sataşa, söz ata bilərlər”- Ekspertdən haqlı irad

“Sözsüz ki, taksi fəaliyyətinin təkmilləşməsi vacib məsələdir. Bütün problemlərin kökündə o dayanır ki, bu sahəyə nəzarət zəifdir və onu təkmilləşdirmək lazımdır ki, taksi sürücüsü işləyən şəxslər öz məsuliyyətlərini dərk etsinlər”

Bunu Adalet.az-a açıqlamasında nəqliyyat üzrə ekspert Elməddin Muradlı deyib. Ekspert qadın sərnişinlərə qeyri-etik təkliflər edən taksi sürücüləri ilə bağlı ciddi tədbirlər görülməsinin vacibliyini vurğulayıb:

“Taksi sürücüləri çox yaxşı bilirlər ki, onlara nəzarət yoxdur. Amma son vaxtlar Daxili İşlər Nazirliyinin həyata keçirdiyi tədbirlər sözün həqiqi mənasında onları silkələyib. Yəni bu belə olmur, nəzarət var, vətəndaş şikayəti olursa, dərhal tədbir görülür. Bundan əvvəl yadımdadı 35 fakt aşkar edilmişdi və orda da taksi sürücülərinin xanım sərnişinlərə qarşı qeyri-etik məsələləri var idi. Ardınca bir neçə fakt da aşkar edildi və dünən nazirliyin açıqlamasından sonra məlum oldu ki, bu proses yenə də davam edir. Təəssüflər olsun ki, taksi sürücüləri arasında başıpozuq insanlar var. Onlar düşünürlər ki, taksiyə minən bütün qadınlara sataşa, söz ata, tanış ola bilərlər. Yəni buna o dərəcədə rahat cəsarət edirlər. Amma çox yaxşı haldır ki, xanımlarımız da ayıqdırlar, belə halla qarşılaşanda dərhal aidiyyatı üzrə şikayət edirlər. Ümumilikdə isə belə halların baş verməməsi üçün taksi fəaliyyətinin təkmilləşdirilməsinə ehtiyac var, onlara ciddi nəzarət olmaldır. Taksi sürücüsü öz üzərində bir məsuliyyət, nəzarət hiss eləsə, inanın ki, bu cür hallar baş verməyəcək. Taksi şirkətlərinin qarşısında bununla bağlı ciddi tələb qoyulmalıdır və nəzarət etmək lazımdır ki, onlar buna nə qədər əməl edirlər”. 

Qeyd edək ki, Daxili İşlər Nazirliyinin apardığı araşdırmalar nəticəsində qadın sərnişinlərə qeyri-etik təkliflər edən taksi sürücüləri məsuliyyətə cəlb edilib.