Özbəkistanın avtomobil sənayesində kifayət qədər təcrübəsi var – Elməddin Muradlı

Azərbaycan-Özbəkistan birgə avtomobil istehsalı müəssisəsində həmçinin də ehtiyat hissələrin istehsal olunacağı da proqnozlaşdırlır.

Bu sözləri AzerPress-ə özəl açıqlamasında nəqliyyat eksperti Elməddin Muradlı deyib.

Ekspert bildirib ki, Azərbaycan - Özbəkistan birgə avtomobil zavodu Türkiyə ilə birgə bu işlərin görülməsi nəzərdə tutulur:

“Bu proseslər Ələt iqtisadi zonasında özünü biruzə verəcək. Bu istiqamətdə də sürətli işlər görülür. Özbəkistanın avtomobil sənayesində kifayət qədər təcrübəsi var. Xüsusilə də, Özbəkistan “daewoo” avtomobillərinin istehsalında çox böyük təcrübə əldə etdi və bu şirkətlərlə səmərəli şəkildə əməkdaşlıq edir. Özbəkistan Azərbaycana qardaş, siyasətimizi, mövqeyimizi dəstəkləyən bir ölkədir. Ümid edirik ki, Azərbaycanın avtomobil sənayesində daha böyük təcrübə toplamasında Azərbaycan - Özbəkistan birgə avtomobil zavodunun fəaliyyəti öz sözünü deyəcək və öz tövhəsini verəcək. Bu proses 2025-ci il üçün nəzərdə tutulub. Tikinti və quraşdırma işləri aparılır. Zavod tez bir zamanda fəaliyyətə başlayacaq”,- E. Muradlı.

Qeyd edək ki, ötən gün Azərbaycan-Özbəkistan birgə avtomobil zavodunun 2025-ci ilin mayında işə salınacağı bildirilib. Zavodun investisiya dəyəri 88 milyon manat təşkil edəcək. Hacıqabul Sənaye Məhəlləsində 16 hektarlıq ərazidə yerləşəcək zavodda 1200 yeni iş yeri açılacaq. Zavodun gücü ildə 30 min avtomobil olacaq. Müəssisədə ABŞ, İtaliya, Çin, Koreya və Özbəkistan kimi ölkələrin texnologiyalarından istifadə olunacaq.