“Sürücülər də normal işləmək istəyirlər” - Ekspertdən AÇIQLAMA

“Ucuz qiymət, keyfiyyətli xidmət” şüarı ilə minlərlə müştəri toplayan bir çox taksi şirkətləri hər gün qəpik-qəpik qiymətləri artırmağa davam edir. İyun ayında əvvəlki ayla müqayisədə əhaliyə göstərilmiş ödənişli xidmətlər arasında bahalaşma əsasən, taksilərə aid olub.

Bəs bu qiymət artımı nə zamana qədər davam edəcək?

Mövzu ilə bağlı “MediaPost”a açıqlama verən nəqliyyat üzrə ekspert Elməddin Muradlı bildirib ki, taksi qiymətlərinin həddən artıq aşağı düşməsi bəzi şirkətlərin marağından irəli gələn, süni şəkildə atılan addımlar idi:

“Rəqabət adı altında atılan bu addımlar sonda ciddi problemlərə gətirib çıxarır. Nəticədə sürücülər yorğun və yuxusuz halda 14-15 saat işləmək məcburiyyətində qalırdılar ki, bu da tez-tez yol-nəqliyyat hadisələrinə, keyfiyyətin aşağı düşməsinə səbəb olur.

İndi kimsə düşünə bilər ki, qiymətin ucuz olması hər kəsə sərf edir. Amma burada insan həyatından söhbət gedir. Dövlətin qoyduğu əsas tələb budur ki, qiymət siyasəti düzgün müəyyənləşdirilsin və bu sahədə təkmilləşdirmə prosesi başlasın”.

Ekspert qeyd edib ki, sürücülərin tibbi müayinəsi, narkoloji dispanserdən arayışın gətirilməsi vacib şərtlərdən biridir: “Qiymət artımı bu səviyyədə davam etməyəcək. Sadəcə bizim gördüyümüz real bazar qiymətləri deyil. Bu, süni şəkildə ucuzlaşdırılmış ödənişlərdir. Bu da sürücülər normal işləyə bilsinlər deyə tənzimlənir.

Bəzi insanların düşüncəsinə görə, biz elə iki-üç manatlıq xidmətdən bəhrələnib rahat olmalıyıq, onlar da başlarının çarəsinə baxmalıdırlar, xoşu gələn işləsin, xoşu gəlməyən çıxsın getsin. Bu da düzgün yanaşma deyil”.