Taksi dayanacağı, yoxsa zibilxana? - Bu küçənin asan həlli olan çətin problemləri - VİDEO

Paytaxtın Şərifzadə küçəsində  qəribə mənzərə yaranıb. Taksi duracağına zibil qabları qoyulub. Sürücülər isə ikinci cərgədə saxlamağa məcbur olur. Bu zaman isə yol polisi onları cərimələyir. 
Avtosfer.az Yasamal rayonu, Şərifzadə küçəsində çəkiliş aparan zaman bu mənzərə ilə qarşılaşıb. 
Maraqlıdır ki, ərazidə bir-birindən cəmi 20-30 metr aralı iki dayanacaq var. Birinci dayanacaq istifadə olunur. İkincisi isə sadəcə orda dayanıb. İkinci dayanacaqdan sonra isə taksilərin dayanması üçün yer təyin olunub. Amma bura da kommunal təsərrüfat idarəsi zibil qabları qoyub.

İndi taksi sürücüləri nə ağzı göyə dayanan avtobus dayanacağında, nə də onlar üçün ayrılmış yerdə saxlaya bilmir. Məcbur olub ikinci sırada, yaxud boş avtobus dayanacağında saxlayanda isə yol polisi onları cərimələyir. 
Əslində problemin çox asan həlli yolu var.

Taksi nişanını boş qalmış avtobus dayanacağına doğru irəli çəkmək, həmin dayanacağı ləğv etmək və zibil qablarının yerini dəyişmək lazımdır. O zaman həm avtobus üçün, həm taksilər üçün, həm də zibil atmağa normal şərait yaranar. İndi qalır ki, müvafiq qurumlar öz aralarında bununla bağlı razılığa gəlib əməli fəaliyyətə keçsinlər. Ətraflı olaraq videonu təqdim edirik:

Fərid