Yasamalda avtobus dayanacağında "obyekt" açıb işlədən kimdir? - VİDEO

Son günlər Bakı şəhər Dövlət Yol Polisi İdarəsinin əməkdaşları paytaxt ərazisində avtobus zolaqları və dayanacaqları zəbt edən sürücülərlə bağlı müxtəlif tədbirlər həyata keçirir. Bu günlərdə Avtosfer.az-la birlikdə keçirilən reyd zamanı maraqlı bir mənzərə ilə qarşılaşdıq. Yasamal rayonu, Şərifzadə küçəsində - "İnşaatçılar" metrostansiyasının qarşısında avtobus dayanacağında ticarət obyekti açılıb. Belə ki, bir nəfər avtomobili avtobus dayanacağında saxlayıb, qarşısında isə dəzgah var və açar təmiri ilə məşğul olur. Hətta yaxınlıqdakı digər obyektdən elektrik enerjisi də çəkilib. Bu səyyar xidmət sahəsinin dayanacaqda fəaliyyət göstərməsi isə avtobusların ikinci cərgədə saxlamasına səbəb olur. 

Avtosfer.az-ın baş redaktoru Elməddin Muradlı obyekti işlədən şəxsə irad bildirərək ona qanunvericiliyi xatırladıb. Amma şəxs sadəcə bu sözlərə qulaq asmaqla kifayətlənib. Görünür daha yaxşı "dayağı" olduğundan bu qədər arxayın davranır və dayanacağı obyektə çevirə bilir. Həmin görüntüləri təqdim edirik. Ümid edirik ki, müvafiq qurumlar bununla bağlı tədbirlər görəcək.

Fərid