“23 il sonra bu qədər əziyyətimin qarşılığında təqaüdümü kəsdilər” - FOTO

23 ildir əlillik pensiyası alan şəkər xəstəsi Bəhmən Hümbət oğlu İmanov təqaüdünün kəsilməsindən narazıdır. 

Avtosfer.az xəbər verir ki, bu barədə “Qafqazinfo”ya Birinci və İkinci Qarabağ müharibəsi veteranı olan Bəhmən İmanov özü müraciət edib. 

Şikayətçinin sözlərinə görə, 2003-cü ildən indiyə qədər əlillik təqaüdü alıb: “Mənim 62 yaşım var, ali savadlı insanam. Lakin hazırda sağlamlığım işləməyimə imkan vermir. 2-ci qrup əliləm, şəkər xəstəsiyəm. Bu vaxta qədər müxtəlif xəstəxanalarda, reabilitasiya mərkəzlərində müalicə almışam. Birinci və İkinci Qarabağ Mühribəsində iştirak etmişəm, veteranam, müxtəlif bədən xəsarətlərim var. İkinci Qarabağ Müharibəsində 17 gün bələdçi kimi iştrak edərkən dalğaya düşərək yüngül travma və qəlpə yarası almışam. 23 ildən sonra bu qədər əziyyətimin qarşılığında Əmək və Əhalinin Sosial Müdafiəsi Nazirliyi təqaüdümü kəsib. Axı mən nə edim? Bu yaşımda sağlamlığımı qeri qaytarsalar, duaçı olaram”.

Məsələ ilə bağlı Dövlət Tibbi Sığorta və Ekspertiza Agentliyinə sorğu ünvanladıq. Agentliyin İctimaiyyətlə əlaqələr və kommunikasiya departamentinin müdiri Tural Qurbanov bildirib ki, onun hazırkı sağlamlıq vəziyyətində əlillik əlaməti müəyyən edilməyib: “Bakı şəhər sakini, 1964-cü il təvəllüdlü İmanov Bəhmən Hümbət oğlunun əlilliyi həm elektron sistem üzərindən, həm də 03.08.2026-cı il tarixdə Dövlət Tibbi Sığorta və Ekspertiza Agentliyinin həkim-ekspertləri tərəfindən əyani baxış şəraitində qiymətləndirilib.

Onun hazırkı sağlamlıq vəziyyətində əlillik əlamətinin olmadığı müəyyən edildiyindən əlillik təyinatı aparılmayıb”.