Aramsız yağışlar maşınlara necə ziyan vurur? – SÜRÜCÜLƏRƏ XƏBƏRDARLIQ - FOTO

Son illərdə fəsillərin dəyişkənliyi və qəfil leysan yağışları Bakı da daxil olmaqla bir çox bölgədə avtomobil sahibləri üçün ciddi problemlərə səbəb olur. 

Avtosfer.az xəbər verir ki, daşqınlar zamanı suyun avtomobilə daxil olması, onun texniki vəziyyətinə ciddi zərər vurur. Əgər avtomobiliniz su altında qalıbsa və siz onu dərhal işə salmağa çalışırsınızsa, bu, əlavə xərclərlə nəticələnə bilər.

Avtomobilin suya düşməsi zamanı ilk risk mühərriklə bağlıdır. Suyun səviyyəsi 20 santimetri keçdikdə, avtomobilin alt hissəsi təsirlənir, daha dərin suda isə mühərrikə su daxil olur. Su silindrlərə çatarsa, yanma prosesi baş vermir, mühərrik dayanır və iç hissələrdə zədələnmələr yaranır. Bu da ciddi təmir işləri və yüksək xərclərlə nəticələnə bilər.

Mühərriki yenidən işə salmazdan əvvəl bir neçə vacib addım atmaq lazımdır. İlk olaraq, akkumulyator ayırılmalı, daha sonra hava filtri və şamlar çıxarılmalıdır. Həmçinin yağ və yağ filtri dəyişdirilməli, elektrik naqillərinin tam quruduğuna əmin olunmalıdır. Çünki avtomobildə yerləşən mühüm elektron hissələr – oturacaq altı, kapot və baqaj hissəsindəki sistemlər su ilə təmas etdikdə qısaqapanma baş verə bilər. Bu da avtomobilin ümumi işinə ciddi təsir göstərə bilər.

Bundan əlavə, elektrik sisteminə su daxil olarsa, bu problemin nəticələri dərhal görünməyə bilər. Zamanla sistemin sıradan çıxmasına, hətta avtomobilin ümumiyyətlə işə düşməməsinə səbəb ola bilər.

Yanacaq sistemində də təhlükə var. Su yanacaq çəninə daxil olarsa, avtomobil zəif işləyə və ya tamamilə işə düşməyə bilər. Belə hallarda yanacaq çəninin tamamilə boşaldılması və təzə yanacaqla doldurulması tövsiyə olunur.

Əyləc sistemi də daşqınlardan zərər görə bilər. Çöküntülər və su bu hissəyə daxil olaraq əyləc effektini azalda bilər. Xüsusilə əyləc mayesinin xüsusiyyətləri dəyişdiyindən qəza riski artır. Buna görə də əyləc mayesinin də yoxlanılması və lazım gəlsə dəyişdirilməsi vacibdir.

Bütün bu riskləri nəzərə alaraq, daşqından sonra avtomobilə mütləq usta baxışı tələb olunur. Əks halda, görünməyən problemlər daha sonra daha böyük zərərlə qarşınıza çıxa bilər.

Eltac Zülfüqaroğlu