Keçiddən keçməyən piyadalar üçün cərimə 200 manat olarsa…

Statistik göstəricilərə görə, il ərzində baş vermis yol-nəqliyyat hadisələri zamanı ölən və xəsarət alanların 50 faizə qədəri piyadavurmaların payına düşür. Qanunvericiliyə əsasən piyadalar tərəfindən yolun hərəkət hissəsinin, dəmiryol keçidinin müəyyən olunmayan yerdən keçilməsinə, eyni zamanda yolda yaxınlaşmaqda olan nəqliyyat vasitələrinin qarşısına qəflətən çıxılmasına görə iyirmi manat məbləğində cərimə tətbiq edilir. Lakin hərəkət sürətinin həddi 80 km/saat və daha artıq müəyyən edilmiş yolda piyadanın yolun hərəkət hissəsini “Yol hərəkəti haqqında” Azərbaycan Respublikasının Qanunu ilə piyadaların yolu keçməsi üçün müəyyən edilmiş yerlərdən kənar keçməsinə görə qırx manat məbləğində cərimə tətbiq olunur. Bəs görəsən bu cərimələr piyadavurmaların qarşısını alırmı?

Təəssüflər olsun ki, bəzən piyadalar “tələsirəm cəriməmi yaz” deyərək məsuliyyətdən yayınırlar. Həmçinin özlərini hansı təhlükəyə atdıqlarının fərqində deyillər. Təbii ki, 20 manat cərimə məbləği o qədər də böyük deyil. Amma bu qayda pozuntusuna görə cərimə məbləği 200 manat olsa necə olar? Bu zaman da piyadalar məsuliyyətsizlik edərmi? Düşünürəm ki, 200 manat cərimə kifayət qədər ciddi məbləğdir ki, piyadanı yolu keçməzdən qabaq düşünməyə vadar edə bilər.

Orxan Əli

Avtosfer.az-ın redaktoru