“Maşının nömrəsində bayraq silinibsə, sürücüyə əvvəlcə xəbərdarlıq edilməlidir” – DEPUTATDAN AÇIQLAMA - FOTO

Son dövrlərdə yol hərəkəti qaydalarının tətbiqi zamanı bəzi hallarda vətəndaşlarla yol polisi əməkdaşları arasında narazılıqlar yaşanır. Xüsusilə texniki qüsurlara görə dərhal cərimə yazılması və ya etibarnamə ilə bağlı hüquqi boşluqlar, cəmiyyətin narahatlığına səbəb olur. Bu cür hallarda vətəndaşlar daha çox maarifləndirmə və xəbərdarlıq edilməsini, cərimənin isə sonrakı mərhələdə tətbiq olunmasını istəyirlər.

Bəs texniki nasazlığa və ya sənədlə bağlı hüquqi anlaşılmazlıqlara görə vətəndaş dərhal cərimələnməlidirmi, yoxsa əvvəlcə xəbərdarlıq edilməlidir?

Mövzu ilə bağlı Milli Məcilisin deputatı Arzuxan Əlizadə Avtosfer.az-a açıqlamasında bildirib ki, avtomobilin dövlət nömrə nişanının bayrağı solğun olduğu üçün inspektor sürücüyə cərimə yazıb:

“Sürücü isə bildirir ki, “niyə dərhal cərimə yazırsınız? Mən diqqət etməmişdim, xəbərdarlıq edə bilərdiniz, gedib düzəldərdim.” Mən də iradımı bildirdim və xəbərdarlıq etməyin mümkünlüyünü qeyd etdim. Onlar isə bildirdilər ki, xəbərdarlıq etmişik, bir gün ərzində nömrə nişanı dəyişdirilməli, yeni nömrə alınmalıdır.
Bu cür yanaşma bəzən insanlarda narazılığa səbəb olur. Cərimə yazmağa yönəlmiş fəaliyyət deyil, ilk mərhələdə xəbərdarlıq edilməlidir. Təbii ki, dövlət atributumuz olan bayraq aydın görünməlidir, nömrə nişanının rəqəmləri də dəqiq seçilməlidir. Ancaq bu hal baş verdikdə, əvvəlcə xəbərdarlıq edilməli, sürücüyə vaxt verilməlidir. Əgər problem aradan qaldırılmazsa, o zaman cərimə tətbiq olunmalıdır.

Digər bir məsələ isə etibarnamə ilə bağlıdır. Məsələn, kiməsə etibarnamə verərkən həmin şəxsin bütün sənədləri qaydasında olur. Amma bir müddət keçdikdən sonra məlum olur ki, etibarnamə verilən şəxsin sürücülük vəsiqəsi məhdudlaşdırılıb və bu barədə mənə heç bir məlumat verilmir. Həmin sürücü avtomobili idarə etməsə də sistemdə onun adı keçdiyi üçün mən avtomobili idarə edərkən cərimə alıram. Çünki sənədlər üzrə avtomobili həmin şəxs idarə etmiş kimi qeydə alırlar. Foto və ya video görüntü olmadan, təkcə cərimənin yazıldığı ünvan əsas götürülərək avtomobilin sahibi cərimələnir. Bu cərimənin məbləği isə kifayət qədər böyükdür – 400 AZN”.

Deputat əlavə olaraq qeyd edib ki, əgər sübut varsa ki, maşını mən yox, etibarnamə verdiyim şəxs idarə edib, bu başqa məsələdir:

“Amma sübut yoxdursa, avtomobil sahibinin məsuliyyət daşıması ədalətsiz hesab olunur. Bu cür hallarda məsələ aydınlaşdırılmadan cərimənin yazılması bir çox hallarda məhkəmə mübahisələrinə səbəb olur. Təəssüf ki, bu tip problemlərlə tez-tez rastlaşırıq. Belə halların ictimailəşdirilməsi vacibdir ki, vətəndaşlar haqsızlıqla üzləşməsin və prosesə dair daha dolğun məlumatlı olsunlar”.

Eltac Zülfüqaroğlu