Maşının qəfil dayanması və sönməsi hansı təhlükələrdən xəbər verir? – ARAŞDIRMA - FOTO

Bəzən avtomobil hərəkətdə olarkən qəfil dayana bilər. Bu cür hallar sürücülər üçün həm narahatedici, həm də təhlükəli ola bilər. 

Avtosfer.az xəbər verir ki, mütəxəssislər bildirir ki, bu kimi hallarda avtomobili yenidən işə salmaq problemin həlli deyil və uzunmüddətli zərərlərə səbəb ola bilər.
Avtomobilin qəfil dayanmasının əsas səbəblərindən biri hava filterinin çirklənməsidir. Zamanla toz və kirin yığılması mühərrikə daxil olan havanın qarşısını alır və nəticədə düzgün hava-yanacaq qarışığı təmin olunmur. Bu da mühərrikin dayanmasına gətirib çıxara bilər.

Digər geniş yayılmış səbəb yanacaq injektorlarının tıxanmasıdır. Yanacağın içindəki çöküntülər və kirlər bu hissələrə təsir edərək mühərrikin qeyri-sabit işləməsinə, yanacaq sərfiyyatının artmasına və qəfil dayanmalara səbəb olur.

Yanacaq pompasındakı nasazlıqlar da bu cür hallara yol aça bilər. Nasos yanacağı mühərrikə ötürə bilmədikdə, avtomobil kifayət qədər güc almır və dayanır. Bu problemin qarşısını almaq üçün nasos və filter mütəmadi yoxlanılmalı, nasazlıq əlamətləri zamanı isə servisə müraciət edilməlidir.
Köhnə avtomobillərdə alışma sistemi xüsusilə alışma şamları və bobinləri – sıradan çıxdıqda mühərrik silindrlərində düzgün yanma baş vermir. Bu da avtomobilin dayanmasına səbəb ola bilər.

Bundan əlavə, mühərrikin işini tənzimləyən bəzi sensorların nasazlığı, məsələn, hava kütləsi (MAF), qaz kəpənəyi mövqeyi (TPS) və ya manifold təzyiqi (MAP) sensorlarının – avtomobilin idarəetmə sisteminə yanlış siqnallar göndərməsinə və nəticədə mühərrikin dayanmasına səbəb olur.

Nəhayət, səsboğucu sistemdə, xüsusən katalitik çeviricidəki tıxanma da mühərrikin işini poza bilər. Əgər avtomobildən yanan rezin iyi gəlirsə, bu, tıxanmanın əlaməti ola bilər.

Bu tip nasazlıqların qarşısını almaq üçün avtomobilə mütəmadi texniki qulluq vacibdir. Əgər avtomobiliniz qəfil dayanırsa və sadalanan əlamətlər müşahidə olunursa, vaxt itirmədən mütəxəssisə müraciət edin.

Eltac Zülfüqaroğlu