Plastik qablardakı suların doğurduğu ekoloji fəlakət

Son 10 ildə dünyada qablaşdırılmış su satışı 73% artıb.  Avtosfer.az-ın xəbərinə görə, bu statistika BMT-nin son hesabatında yer alır. 
Hesabat müəllifləri bildirirlər ki, qablaşdırılmış su alışına sərf edilən vəsaitin yarısı qədər investisiya qoyulsa içməli su planetin bütün sakinləri üçün əlçatan olardı. Son 10 ildə planetimizdə insanlar qablaşdırılmış suya 270 milyard dollar xərcləyiblər.  

BMT-nin Su, Ətraf mühit və Sağlamlıq Universiteti plastik qablarda satılan suları analiz edərək hesabat hazırlayıb. Hesabat  müəlliflərinə görə, qablaşdırılmış su bəzi ölkələrdə kran suyundan min dəfə bahadır. Ən əsası, tanınmış markaların suları da əksər hallarda plastik çirklənməyə məruz qalıb. Bir çox ölkədə qablaşdırılmış sular nəinki beynəlxalq, heç yerli standartlara da uyğun gəlmir.

Dövlətlər plastik qablarda su satışının qarşısını almaqda acizdir. Ekoloji zərərə gəldikdə isə, yeraltı suların qablaşdırılaraq satılması qrunt suların tükənməsinə və torpağın münbitliyinin azalmasına səbəb olur.

Vüqar