Qəza törədən sürücülər bu halda cərimə oluna bilməz - Qanun belə deyir

Qəza törədib hadisə yerini tərk etmiş sürücülərin məsuliyytə cəlb edilməsi ilə bağlı qanunvericiliyə maraqlı bir dəyişiklik edilib. Lakin əksər sürücülər bundan hələ də xəbərsizdir.

Avtosfer.az xəbər verir ki, əvvəllər qəza törədib hadisə yerini tərk edən sürücülər öz aralarında razılığa gəlsələr belə, təqsirkar sürücü hadisə yerini tərk etdiyinə görə 4 bal 100 manat məbləğində cərimə edilirdi. Qeyd edək ki, İnzibati Xətalar Məcəlləsinin 327-ci maddəsinin “qeyd” hissəsinə 7-1-ci bəndi əlavə olundu. Orada qeyd olunub ki, yol-nəqliyyat hadisəsinin baş verməsində təqsirli olan şəxsin müəyyən edilməsi üzrə tərəflər arasında mübahisə olmadığı və həmin yol-nəqliyyat hadisəsi nəticəsində sağlamlığa zərər dəymədiyi halda sürücünün hadisə yerini tərk etməsinə bu Məcəllənin 327.6-cı maddəsinin qüvvəsi şamil edilmir.

Bu o deməkdir ki, yol nəqliyyat hadisəsi zamanı sağlamlığa zərər dəyməyibsə və təqsirkar sürücü öz günahını boynuna alırsa, hadisə yerini tərk etməyə görə həmin sürücü məsuliyyətə cəlb oluna bilməz.

Emin