Qəzadan sağ çıxmaq üçün avtomobildə bu sistem vaxtaşırı yoxlanmalıdır - FOTO

Müasir avtomobillərdə sürücü və sərnişinlərin təhlükəsizliyini təmin edən hava yastığı sistemləri qəza anında həyati rol oynayır.

Avtosfer.az xəbər verir ki, bu sistemin nasazlığı barədə məlumat verən hava yastığı xəbərdarlıq işığı (airbag warning light) isə əsas göstəricilərdən biridir. Bəs bu işıq niyə yanır və nə zaman təhlükəyə işarə edir?

Hava yastığı işığı nədir?

Avtomobil işə düşdükdə bir neçə saniyə yanaraq yoxlamadan keçən bu işıq, sistemdə nasazlıq olmadığını göstərir. Lakin hava yastığı sistemi ilə bağlı hər hansı texniki problem yaranarsa, bu işıq davamlı şəkildə yanmağa başlayır və sürücünü xəbərdar edir.

İşığın daimi yanmasına səbəb ola biləcək hallar:

1) Hava yastığı sensor və yuvalarında təmas problemləri;

3) Sükan çarxı və hava yastığı arasında nasaz əlaqə;

4) Avtomobildə ümumi elektrik nasazlığı;

5) Təhlükəsizlik kəmərinin sensorlarında boş və ya zəif təmas;

6) Avtomobilin daha əvvəl qəza keçirməsi və hava yastığının açılması.

Xüsusilə ikinci əl avtomobillərdə bu işığın səbəbi, əvvəlki qəzadan sonra hava yastığı sisteminin düzgün bərpa olunmaması ola bilər.

Avtomobil işə düşərkən işığın qısa müddətli yanıb sönməsi normalır. Ancaq bu hal davamlı olarsa və avtomobili söndürüb yenidən işə salmaqla problem həll olunmursa, bu, daha ciddi texniki nasazlığa işarə edir. Belə hallarda avtomobil təcili olaraq mütəxəssis servisdə yoxlanılmalıdır.

Hava yastığı xəbərdarlıq işığının davamlı yanması təhlükəsizlik riski yaradır. Bu səbəbdən nasazlıq təxirə salınmadan aradan qaldırılmalıdır. Avtomobilinizi ən yaxın texniki servisdə yoxlatdırmaqla problemin dəqiq səbəbini müəyyən edib tez bir zamanda həll etdirə bilərsiniz.

Eltac Zülfüqaroğlu