Bakı-Ələt yolunda yarışa çıxan "avtoş"lar təhlükə saçdılar - VİDEO

Bakı-Ələt yolunda avtoxuliqanlıq edən sürücülər kameraya düşüb. Bu barədə oxuculardan biri qeydə aldığı videonu sosial şəbəkə hesabımıza göndərib. Avtosfer.az xəbər verir ki, hadisə dekabrın 29-da, sözügedən yolun Qobustan qəsəbəsindən keçən hissəsində baş verib. Belə ki, 10-UX-048 və 18-BE-880 qeydiyyat nişanlı "Nissan" markalı avtomobillərin sürücüləri yüksək sürətlə hərəkət edərək yarışa çıxıblar. Onların yarış keçirmələri aydın şəkildə videogörüntüyə qeyd olunub.

İnzibati Xətalar Məcəlləsinin 511.1.1-ci maddəsində qeyd olunub ki, aşkar surətdə iki və ya daha artıq mexaniki nəqliyyat vasitəsinin iştirakı ilə sürət yarışının həyata keçirilməsinə görə - nəqliyyat vasitəsini idarə etmək hüququ bir il müddətinə məhdudlaşdırılmaqla beş yüz manatdan yeddi yüz əlli manatadək məbləğdə cərimə edilir və ya nəqliyyat vasitəsini idarə etmək hüququ bir il müddətinə məhdudlaşdırılmaqla işin hallarına görə, pozuntunu törədənin şəxsiyyəti nəzərə alınmaqla, on beş gündən bir ayadək müddətə inzibati həbs tətbiq olunur.

Fərid