Bakıya gələn avtobusun sürücüsü sərnişinləri yarıyolda qoydu - SƏBƏB - VİDEO

Sərnişinlər Saray qəsəbəsindən metronun "20 Yanvar" stansiyası istiqamətində hərəkət edən 508 nömrəli marşrut avtobusundan şikayətçidir.

Oxu.az-a şikayət ünvanlayan sərnişinlər bildiriblər ki, bu gün sözügedən avtobusun sürücüsü Xırdalan şəhərinə çatdıqda mənzil başına çatmamış hər kəsi avtobusdan endirib.

Onların sözlərinə görə, yol boyu nəqliyyat vasitəsindən yanıq qoxusu gəlib:

"Avtobusdan yanıq qoxusu gəlirdi. Xırdalana çatanda sürücü hamını düşürdü, heç bir səbəb demədən maşını sürüb getdi. İşə gecikənlər yolda qaldılar. Bu marşrut xəttində interval 15 dəqiqədir. Növbəti gələn nəqliyyat vasitəsi dolu olduğu üçün heç kim gedəcəyi ünvana vaxtında çata bilmədi".

Sərnişinlərin bir qismi isə qeyd edib ki, 508 nömrəli marşrut avtobusunun bəzilərində kart oxuyucusunda da problem yaşanıb.

Məsələ ilə bağlı Azərbaycan Yerüstü Nəqliyyat Agentliyindən (AYNA) bildirilib ki, Saray qəsəbəsindən metronun "20 Yanvar" stansiyası istiqamətində hərəkət edən 508 nömrəli marşrut avtobusunda texniki problem yaranıb:

"Hazırda avtobus təmir üçün xətdən kənarlaşdırılıb. Daşıyıcıya marşrutun nizamlı fəaliyyətinin təmin edilməsi barədə tapşırıq verilib. Eyni zamanda xətt üzrə bəzi avtobuslarda kart oxuyucusu ilə bağlı yaranan problem aradan qaldırılıb".