Bir anlıq məsuliyyətsizlik bütöv bir meşəni yox edə bilər – FHN-dən XƏBƏRDARLIQ - VİDEO

Yay mövsümünün başlaması ilə havaların istiləşməsi və quraqlığın artması fonunda meşə yanğınları riski yüksəlib. Bununla bağlı Fövqəladə Hallar Nazirliyi (FHN) əhaliyə rəsmi müraciət edərək, meşələrdə və yol kənarlarında yanğın təhlükəsizliyi qaydalarına ciddi əməl olunmasının vacibliyini vurğulayıb.

Avtosfer.az bildirir ki, nazirlik tərəfindən yayılan videoda siqaret kötüyünün meşələrdə və ya avtomobillərdən yollara atılmasının potensial yanğın səbəbi olduğu qeyd olunub. Bildirilib ki, ani bir diqqətsizlik böyük fəlakətə — genişmiqyaslı meşə yanğınlarına yol aça bilər.

FHN həmçinin yolların kənarlarına və ictimai ərazilərə zibil atmağın da təhlükəli nəticələr doğura biləcəyini xüsusi vurğulayıb. Qeyd olunub ki, yol kənarına atılan tullantılar, xüsusilə şüşə butulkalar və yanar materiallar, günəş şüalarının təsiri ilə alovlana bilər, bu isə hem avtomobil yollarında, həm də yaxınlıqdakı ərazilərdə yanğınlara səbəb ola bilər.

Eltac Zülfüqaroğlu