Bu yolda avtobuslar dönəndə qəza riski yaradır - Aqil Rəhimov sürücülərə səsləndi - VİDEO

Bakının Mərdanov qardaşları ilə Hənifə Ələsgərov küçələrinin kəsişməsi hazırda sürücülər üçün ciddi təhlükə mənbəyinə çevrilib. Bu mövzu ilə bağlı qəza əleyhinə kursların məşqçisi Aqil Rəhimov həmin ərazidə videoçəkiliş apararaq sürücülərin diqqətinə çatdırıb. Avtosfer.az-ın verdiyi məlumata görə, sözügedən kəsişmədə xüsusilə sağa dönən iriqabaritli nəqliyyat vasitələri, o cümlədən marşrut avtobusları üçün manevr etmək çətinlik yaradır.

Əsas problem ondan ibarətdir ki, svetoforun qırmızı işığı yanarkən stop xəttin tam qarşısında dayanmış avtomobillərlə sağa dönən avtobusların hərəkət trayektoriyası kəsişir.

Aqil Rəhimov bildirib ki, sürücülər qırmızı işıq yanan zaman tam stop xətt üzərində deyil, ondan 2-3 metr geridə dayansa daha təhlükəsiz olar. Belə olan halda, dönmə bucağını düzgün təyin edə bilməyən avtobuslar onlarla toqquşmadan keçə biləcək.

Mütəxəssislər hesab edir ki, problemin aradan qaldırılması üçün kompleks yanaşma tələb olunur. Ya bu kəsişmədə yol hərəkətinin təşkili yenidən nəzərdən keçirilməli, ya da həmin marşrut xəttinin keçdiyi istiqamət dəyişdirilməlidir. Əks halda, həm qəza riski davam edəcək, həm də nəqliyyat axınında lüzumsuz ləngimələr yaranacaq.

Fərid