Buzlu yolda “VAZ”ı fırladıb riskli manevrlər edən “avtoş” sürücü - 90-HR-507 - VİDEO

Yol-hərəkəti qaydalarını kobud şəkildə pozan sürücü özünü videoya çəkərək sosial şəbəkə hesabında paylaşıb.

Avtosfer.az-ın məlumatına görə, 90-HR-507 dövlət nömrə nişanlı “VAZ-2107” markalı avtomobilin sürücüsü yolda sərt manevrlər edib. Qəbələ rayonunda qeydə alınmış görüntüdə o, buzlu yolda avtomobili dəfələrlə fırladaraq drift şou göstərib. Bu zaman sürücü özüylə yanaşı digər avtomobillərə təhlükə yaradıb. Mingəçevir şəhəri ərazisində çəkilmiş videoda isə sürücü avtomobili qapısı açıq halda idarə edib və bədəninin yarısını maşından çölə çıxararaq görüntünü qeydə alan şəxslə danışıb.

Xatırladaq ki, sürücünün törətdiyi əməl avtoxuliqanlıq əməli sayıldığı üçün İnzibati Xətalar Məcəlləsinin 511.1-ci maddəsiylə nizamlana bilər. 

DİN-in Mətbuat Xidmətinin Şəki regional qrupundan Avtosfer.az-ın sorğusuna cavab olaraq bildirilib ki, görüntülər araşdırılır və qısa zamanda məlumat veriləcək.

Nərmin