Əks yola çıxan sürücü qarşıdan gələn avtomobili təhlükə ilə üz-üzə qoydu - VİDEO

Paytaxtın Ziya Bünyadov prospektində kobud qayda pozan sürücü avtomobilin kamerasına düşüb.

Avtosfer.az-ın məlumatına görə, hadisə mayın 20-də saat 13:19 radələrində qeydə alınıb. Kadrlardan görünür ki, 77-NE-605 dövlət nömrə nişanlı “Volkswagen” markalı avtomobilin sürücüsü qoşa xəttin tələbini pozaraq əks istiqamətli yola çıxıb və axının əksinə hərəkət edib. Bu zaman qarşıdan gələn nəqliyyat vasitələri üçün ciddi təhlükə yaranıb.

Xoşbəxtlikdən görüntünü qeydə alan sürücü ehtiyatlı davranaraq baş verəcək qəzanın qarşısını alıb. Hadisə bir daha göstərir ki, bir neçə saniyə vaxt qazanmaq naminə edilən təhlükəli manevr həm sürücünün, həm də digər hərəkət iştirakçılarının həyatını riskə atır. Xüsusilə prospekt və intensiv hərəkət olan yollarda əks istiqamətə çıxmaq ən ağır nəticələrə səbəb ola biləcək qayda pozuntularından hesab olunur.

Nərmin