İnsanları ölümə aparan sürücünü videoya çəkib təşəkkür etdilər - VİDEO

Şamaxı-Bakı yolunda çəkilmiş video sosial şəbəkədə müzakirə mövzusu olub. Avtosfer.az xəbər verir ki, görüntülərdə 77-HE-962 qeydiyyat nişanlı "Mercedes" markalı avtomobilin sürücüsü radarlara çatan zaman qəza dayanma işıq siqnalını qoşaraq arxadan gələn sürücülərə xəbərdarlıq etdiyi əks olunub. 90-SY-187 qeydiyyat nişanlı "Renault" markalı avtomobilin sürücüsü isə bunu “gözəl” hərəkət kimi videoya çəkərək sosial şəbəkədə paylaşıb və ona sosial şəbəkə vasitəsilə təşəkkürünü bildirib.

Qeyd edək ki, “Mercedes" markalı avtomobilin sürücüsü digərlərinə “yaxşılıq” etdiyini düşünsə də bunun nə qədər təhlükəli olduğunu anlamır. Çünki yollara quraşdırılmış radarlar sürət həddini aşan, ölüm təhlükəsi yaradan, yolları qan gölünə çevirən sürücülərin məsuliyyətə cəlb edilməsi məqsədini daşıyır. Bu gün öz aləmində “yaxşılıq” etdiyi sürücülər, sabah hərəkət sürətini aşaraq “Mercedes" sürücüsünün əzizlərinin həyatına son qoya bilər.

Fərid