Maşının nömrələrini gizlədən “qazi”ni yol polisi belə saxladı – Həbsi də var imiş... - VİDEO

Yol polisi dövlət qeydiyyat nişanını avtomobilin yük yerində gizlədərək məsuliyyətdən yayınan sürücünü aşkar edib.

Avtosfer.az xəbər verir ki, hadisə Bakı şəhər Dövlət Yol Polisi İdarəsinin Yasamal rayonu Abbas Mirzə Şərifzadə küçəsində həyata keçirdiyi maarifləndirmə tədbirləri zamanı qeydə alınıb.

Belə ki, 90-UP-646 qeydiyyat nişanlı “Lifan” markalı avtomobilin sürücüsü maşını yolun hərəkət hissəsinin ikinci zolağında park edərək həm qayda pozub, həm də digər hərəkət iştirakçılarına maneə yaradıb.

Araşdırma zamanı özünü “qazi” kimi təqdim edən şəxsin dövlət nömrə nişanlarını qəsdən çıxardığı və avtomobilin əlil olan başqa şəxsin adına olduğu məlum olub. Yoxlama zamanı sürücünün adına çoxsaylı ödənməmiş cərimələrin olduğu və avtomobilin üzərinə həbs qərarı qoyulduğu məlum olub.

DYP əməkdaşları sürücü ilə bağlı qanunamüvafiq tədbirlər görüb və avtomobil duracağa yerləşdirilib.