Operativ nəqliyyat vasitələrinə yol verməyən sürücülər bu halda cərimələnə bilməz - Aqil Rəhimov

Yol hərəkəti qaydalarına digər sürücülərin əməl etdiyi kimi, operativ nəqliyyat vasitələrinin sürücüləri də əməl etməlidir. Lakin qanunvericilikdə operativ nəqliyyat vasitələri üçün istisna hallar müəyyən edilib.

Onlar hansı hallarda qaydalardan kənara çıxa bilərlər?

Qəza əleyhinə kursların məşqçisi Aqil Rəhimov Avtosfer.az-a açıqlamasında bildirib ki, operativ nəqliyyat vasitəsi o zaman operativ nəqliyyat vasitəsi sayılır ki, sayrışan işıqlarını yandırıb və eyni zamanda səs siqnalından istifadə etsin:

“Əgər ikisindən biri qoşulu deyilsə, o, operativ nəqliyyat vasitəsi sayılmır. Operativ nəqliyyat vasitəsi qaydaları poza bilər, amma ehtiyat tədbirlərini görməli və başqa sürücüləri də nəzərə almalıdır.

Ona görə də polis və ya təcili yardım səs siqnallarını qoşubsa və sayrışan işıqları varsa, ona yol vermək lazımdır. Sürücülər bu vəziyyətdə operativ nəqliyyat vasitəsinə yol vermədikdə, inzibati məsuliyyətə cəlb edilə bilər. Lakin sayrışan işıqlar və xüsusi səs siqnalı qoşulu olmadıqda, həmin nəqliyyat vasitəsinə yol verməyən sürücülər məsuliyyətə cəlb edilə bilməz”. 

Eltac Zülfüqaroğlu