Özünü düşünən bu cür sürücülər yüzlərlə insanı ləngidir - VİDEO

Bakıda taksi sürücüsü qaydaları kobud şəkildə pozub. Avtosfer.az xəbər verir ki, hadisə noyabrın 6-da, paytaxtın Abdulla Şaiq küçəsində baş verib.

Belə ki, 77-MD-947 qeydiyyat nişanlı "Honda" markalı avtomobilin sürücüsü hərəkət etdiyi zolaqda sıxlığın yarandığını görən zaman sol zolağa keçib. Bir neçə avtomobili ötüb keçdikdən sonra, Mirzəağa Əliyev küçəsi istiqamətinə getmək istəyən sürücü hərəkətdə olan maşınların qarşısına keçib və bu zaman bütöv xəttin tələbini pozub.

Qeyd edək ki, sıxlıqda qalmamaq üçün qaydaları bu formada pozan sürücülərə tez-tez rast gəlmək olur. Bilmək lazımdır ki, bir sürücünün belə etməsi, digər avtomobillərin tormozlayaraq sürəti aşağı salmalarına səbəb olur. Nəticədə yolda sıxlıq daha da artır və digər hərəkət iştirakçıları ləngiyir.

Xatırladaq ki, bu qayda pozuntusuna görə, İnzibati Xətalar Məcəlləsinin 327.1-ci maddəsilə 40 manat məbləğində cərimə nəzərdə tutulub.

Fərid