Səkini tamamilə zəbt edib əlil şəxsi çətin vəziyyətdə qoyan sürücü - 77-NK-850 - VİDEO

Paytaxtın Yasamal rayonu Həsən bəy Zərdabi prospektində dayanma-durma qaydasını pozan sürücü görüntülənib.

Avtosfer.az-ın məlumatına görə, hadisə dekabrın 19-da axşam saatlarında qeydə alınıb. Videodan göründüyü kimi, 77-NK-850 dövlət nömrə nişanlı “KIA Sorento” markalı avtomobilin sürücüsü maşını səkidə park edərək piyadaların hərəkətinə əngəl törədib. Hətta o, ərazidən keçən fiziki məhdudiyyətli şəxsə çətin anlar yaşadıb. Belə ki, səkidən istifadə edə bilməyən əlil vətəndaş maşının arxa hissəsindən hərəkətinə davam etməyə çalışıb. Lakin o, əlil arabasında olduğu üçün ərazidəki arxdan keçə bilməyib. 

Qeyd edək ki, yaxınlıqda yaşayan sakinlər belə xoşagəlməz halla tez-tez qarşılaşdıqlarını bildirib. 

Xatırladaq ki, maşını səkidə park etmək İnzibati Xətalar Məcəlləsinin 346.1-ci maddəsinə əsasən, 2 bal və 60 manat məbləğində cəriməylə nəticələnir. 

Nərmin