Sürətlə gələn "Prius" məktəbin ərazisinə "protiv" girdi - ANBAAN VİDEO

Sükan arxasında olan hər bir şəxs qanunla təsdiq olunmuş qaydalara riayət etməlidir. Təbii ki, bu qaydaların icrasında başlıca məqsəd təhlükəsizliyin təmin olunmasıdır. Hər hansı kiçik pozuntu belə böyük faciəyə səbəb ola bilər.

Sürücülərin ən çox əməl etmədiyi qayda pozuntularından biri də sürət həddinin aşılmasıdır. Bu qaydanı pozanların bir qismi yalnız yollarda deyil istənilən ərazidə avtomobili yüksək sürətlə idarə edir. Xüsusilə onlar yaşayış komplekslərində, məhəllələrdə, məktəb və bağçaların həyətində sürət həddini aşaraq insanlara təhlükə yaradırlar. Qanunazidd hərəkət edən belə sürücülər unutmamalıdır ki, bu, qəzanı qaçılmaz edir. Ən pis halda təbii ki, insan ölümüylə nəticələnir.

İşıqlandırdığımız qayda pozuntusuyla bağlı izləyici Avtosfer.az-a videomaterial göndərib. Bildirib ki, hadisə bu gün səhər saatlarında Zığ şossesi yaxınlığında yerləşən “SABIS Sun İnternational School”un ərazisində qeydə alınıb. Görüntüdən aydın olduğu kimi, 77-BC-213 dövlət nömrə nişanlı “Toyota Prius” markalı avtomobilin sürücüsü əks istiqamətli yol ilə hərəkət edib. Şikayətçinin iddiasına görə, qayda pozan sürücü bununla kifayətlənməyərək sürət həddini aşıb. Taksi sürücüsünün yüksək sürətlə hərəkət etməsi hər şeydən öncə şagirdlərin həyatı üçün təhlükədir. Şikayətçi bir valideyn olaraq bu vəziyyətdən narahat olduğunu və əməli törədən sürücüylə bağlı lazımi tədbir görüləcəyinə ümid etdiyini əlavə edib.

Nərmin