Yol polisi yaşıl işıqda keçən sürücüyə cərimə yazdı - FOTO - VİDEO

Qayda pozmadığı halda cərimələndiyini iddia edən sürücü redaksiyamızın qaynar xəttinə şikayət ünvanlayıb. Avtosfer.az xəbər verir ki, hadisə Masallı rayonunda baş verib. Sürücü Pərviz Nəsirov bildirir ki, Masallı şəhəri Həzi Aslanov küçəsində hərəkətdə olarkən svetoforun yaşıl işığında geriyə dönüb. Bu zaman ərazidə xidmət aparan yol polisi əməkdaşı onu dayandıraraq qırmızı işıqda keçdiyini bildirib. Sürücü qayda pozmadığını desə də, polis əməkdaşı onu İnzibati Xətalar Məcəlləsinin 327.2-ci maddəsi ilə 3 bal və 100 manat məbləğində cərimə edib.

Videogörüntüdən də aydın şəkildə görünür ki, sürücü stop xəttini keçən zaman svetoforun yaşıl işığı yanılı olub. Yolayrıcına daxil olduqdan sonra isə yaşıl işıq yanıb-sönərək qırmızı işığa keçib.

"Yol hərəkəti haqqında" qanunda qeyd olunub ki, svetoforun icazə siqnalı yanarkən yolayrıcına girmiş sürücü yolayrıcının çıxışında qoyulmuş svetoforun siqnalından asılı olmayaraq nəzərdə tutulan istiqamətdə dayanmadan hərəkət etməlidir. Bu zaman qalan nəqliyyat vasitələri ona maneə törətməməlidirlər.

Könül Rauf