Yolu kəsib dava edən qoçu sürücünü yol polisi saxladı: MƏHKƏMƏYƏ ÇIXARILACAQ - VİDEO

Bakıda yol hərəkəti qaydasını pozan sürücünün videosunu oxuculardan biri qeydə alaraq redaksiyamızın qaynar xəttinə göndərib. Avtosfer.az xəbər verir ki, hadisə dekabrın 27-də, paytaxtın Hənifə Ələsgərov küçəsində baş verib. Belə ki, 77-ME-910 qeydiyyat nişanlı "Hyundai" markalı avtomobilin sürücüsü öncə sağa hərəkət təşkil edilmiş zolağa daxil olaraq həmin istiqamət üzrə hərəkət edənlərin yolunu kəsib. Daha sonra isə orta zolağa yerdəyişmə etmək istəyən zaman görüntünü qeydə alan sürücüyə qəza şəraiti yaradıb. Bu azmış kimi onun qarşısını kəsərək hərəkəti tam şəkildə məhdudlaşdırıb. Səhv olduğu halda üzr istəmək əvəzinə avtomobildən düşərək dava etməyə başlayıb.

Bütün bunlardan sonra o yenidən hərəkətə başlayan zaman görüntünü qeydə alan sürücünün yolunu kəsməkdə davam edib.

Videogörüntünü qeydə alan oxucu bildirir ki, yol polisi artıq həmin sürücü barəsində İnzibati Xətalar Məcəlləsinin 511-ci maddəsilə protokol tərtib edib və toplanılmış materiallar aidiyyəti üzrə məhkəməyə göndərilib.

Fərid