Zəbt olunan keçidlər, parkinqə çevrilən səki - FOTO

Paytaxtda piyadaların rahat və təhlükəsiz hərəkəti üçün keçid və səkilər təşkil edilib. Lakin bəzi sürücülər avtomobilini səkidə park edərək buna mane olur.

Avtosfer.az xəbər verir ki, hətta bəzi sürücülərdə o qədər arxayınlıq yaranıb ki, kimi piyada yolunu parkinqə çevirir, kimi də maşını piyada keçidində park edir. Belə ki, sosial şəbəkələrdə geniş yayılmış fotolarda aydın şəkildə görünür ki, “Subaru Forester” markalı 90-MO-072 qeydiyyat nişanlı və “Vaz” markalı 10-KL-072 nömrəli avtomobillərin sürücüləri nəqliyyat vasitələrini piyada keçidində parklayıb. Həmçinin digər fotoda obyektin önündəki səkinin parkinqə çevrildiyi əks olunub.

Qeyd edək ki, Daxili İşlər Naziri Vilayət Eyvazov dünən də DİN-in kollegiya iclasında bu məsələyə toxunub, tabeliyindəki şəxslərdən qanunsuz parklanmaların, dayanma və ya durmaların qarşısının alınmasını tələb edib. Ümid edirik ki, sözügedən problem tezliklə aradan qaldırılacaq. Piyadaların rahat hərəkəti təmin olunar.

Məhəbbət Tərlanoğlu