Zolağı zəbt edən “Vito” qəza işıqlarını yandırıb tıxac yaratdı - VİDEO

Paytaxtın “20 Yanvar” metrosu yaxınlığında qayda pozan sürücü nəqliyyat vasitələrinin hərəkətini məhdudlaşdırıb.
Avtosfer.az-ın məlumatına görə, hadisə yanvarın 30-u axşam saatlarında qeydə alınıb. Videodan göründüyü kimi, 50-EL-817 dövlət nömrə nişanlı “Mercedes Vito” markalı avtomobilin sürücüsü dayanma-durma qaydalarını pozub. Belə ki, o, maşının qəza işıqlarını yandıraraq yolun sağ zolağını zəbt edib və nəqliyyat vasitələrinə yol verməyib. Nəticədə digər hərəkət iştirakçılarına çətinlik yaradıb. Zolağın məşğul olduğunu görən sürücülər məcbur qalaraq qarşı tərəfə keçiblər. Həmçinin yolda sıxlıq yaranıb. 
Qeyd edək ki, bu ərazidə hər gün dayanma-durma qaydaları pozulur. Xüsusilə taksi fəaliyyəti üzrə məşğul olan sürücülər yolun istənilən hissəsində saxlayaraq hərəkətə əngəl törətməklə yanaşı qəza riskinə səbəb olurlar. 
Xatırladaq ki, İnzibati Xətalar Məcəlləsinin 346.1-ci maddəsinə əsasən sürücü 20 manat cərimə ödəmək məcburiyyətindədir.

Nərmin