"20 Yanvar"dakı "yiyəsiz" obyektlərin aqibəti necə olacaq? – AÇIQLAMA - FOTO

Metronun “20 Yanvar” stansiyasının altındakı yeraltı keçidlərdə yerləşən ticarət obyektləri bir ilə yaxındır ki, fəaliyyət göstərmir. Ara-sıra bu obyektlərin açılacağı barədə xəbərlər gündəmə gəlsə də, bu elə söz olaraq qalıb. Mağaza sahibləri isə hələ də ümidlə görləyirlər. Onlar hətta mallarını mağazalardan görürməyiblər. Yaxınlıqdakı ticarətçilərin sözlərinə görə, obyektlərin nə vaxt açılacağı barədə rəsmi məlumat yoxdur.

Bəs, bu obyektlərin aqibəti necə olacaq? Mağazalar yenidən fəaliyyət göstərəcəkmi?

Avtosfer.az-ın məlumatına görə, məsələ ilə bağlı “Bakı Metropoliteni” Qapalı Səhmdar Cəmiyyətinə sorğu ünvanladıq. Qurumun İctimaiyyətlə əlaqələr şöbəsindən "Bakupost"a verilən açıqlamada bildirildi ki, qeyd olunan keçidlərdə yerləşən ticarət obyektləri “Bakı Metropoliteni” QSC-nin balansında deyil:

“Onların fəaliyyəti ilə bağlı hər hansı sərəncamvermə səlahiyyətimiz mövcud deyil”.

Məsələ ilə bağlı Bakı Şəhər İcra Hakimiyyəti ilə də əlaqə saxladıq. Qurumun mətbuat katibi Mətin Hüseynov bildirdi ki, keçidlərdəki ticarət obyektləri Bakı Şəhər İcra Hakimiyyətinin balansında deyil:

“Bakı Şəhər İcra Hakimiyyətinin balansında heç bir yeraltı keçid yoxdur”.

Bakı Şəhər Ticarət və Xidmət Departamentinin direktoru İntiqam Məmmədov bildirdi ki, bu məsələ ilə bağlı heç bir məlumatı yoxdur:

"Tam səmimi deyirəm ki, o obyektlərlə bağlı bizim heç bir məlumatımız yoxdur. Yəqin ki, oranın yiyəsi bilər. Ora özəl mülkiyyətdə olan yerdir, oranın bizə aidiyyəti yoxdur".